img
img

Bagian Protokol & Komunikasi Publik

Pemerintah Kabupaten Kutai Kartanegara

Berita

Busu H. Otoy Nyambut Sida Peserta Benchmarking Diklat PIM III Jatim

date_range 18 Juli 2017 | Oleh : KP.04-Medsi07
Busu H. Otoy Nyambut Sida Peserta Benchmarking Diklat PIM III Jatim

FOTO Staf ahli Bupati Kutai Kartanegara (Kukar) Bidang Pemerintahan ngan Kesejahteraan Rakyat busu H. Otoy Usman mberikan kenang-kenangan ke Kabid Diklat ngan Kompetensi Manajerial busu Ramlianto (jpg1)

TENGGARONG – Busu H. Otoy Usman Staf ahli Bupati Kutai Kartanegara (Kukar) Bidang Pemerintahan dan Kesejahteraan Rakyat nerima 45 urang sida peserta Diklat Kepemimpinan Tingkat III angkatan 56 tahun 2017 Provinsi Jawa Timur nya beasal dari bemacam provinsi di Indonesia, Kamis minggu kemai (13/7) di ruang serba guna Kantor Bupati Kukar. Ketua Rombongan Benchmarking Diklat PIM III Angkatan 56 busu Ramlianto nyebut, ngkan dipilihnya Kabupaten Kukar jadi daerah tujuan sida, karna Kukar dipandang dah berhasel di pengelolaan bemacam kegiatan nya inovatif ngan bejalan efektif.

Busu tu jua beharap ke sida peserta diklat PIM III ne bisa ngadopsi, ngan molah replica pengetahuan supaya bisa diterapkan di unit kerjanya kendia masing-masing pas mlewati analisis ngan kajian nya cermat. “Kunjungan ne tetuju di Dinas Sosial ngan Dinas Kesehatan Kabupaten Kukar,” bunyi leh busu Kabid Diklat ngan Kompetensi Manajerial busu Ramlianto. Sambutan Bupati Kukar nya dibacakan busu H Otoy Usman nyebut Pemerintah Kukar nyambut gembira ngkan kedatangan sida peserta Diklatpim III ke Kota Tenggarong, nya telebeh lagi pas ne Pemerintah Kukar lagi nyiapkan pelaksanaan Festival Budaya Erau 2017.  Makanya hak tu, nya jua ngundang sida peserta benchmarking supaya datang balik bekunjung nghadiri Festival Budaya Erau 2017 di Tenggarong pada tanggal 22-30 Juli bulan hadap ne. 

Bupati Kukar jua beharap kedatangan sida peserta benchmarking tu bisa lebeh mpererat tali silaturahmi antara Pemerintah Kukar ngan Badan Diklat Provinsi Jawa Timur nya selawasan ne dah tejalin ngan baik. Kesempatan nya ada ne, dimintaknya bisa jadi sarana ntuk saling behurupan pengalaman, khususnya ntuk bubuhan sida peserta Diklatpim III ngan Organisasi Perangkat Daerah (OPD) nya jadi lokus di  benchmarking ne,  di rangka ngamati kinerja ngan produktivitas OPD lokus, moga ja ngan adanya kunjungan ne, Kukar sorang bisa ndapatikan masukan ngan saran supaya terus ningkatikan kinerja ngan produktivitas OPD. (KP.04-Medsi07)