img
img

Bagian Protokol & Komunikasi Publik

Pemerintah Kabupaten Kutai Kartanegara

Berita

Goweser Ngumpati GPN 2017 Di Bulan Ramadhan

date_range 15 Juni 2017 | Oleh : KP.04-Medsi08
Goweser Ngumpati GPN 2017 Di Bulan Ramadhan

FOTO Bupati Kukar embok Rita Widyasari ndengani Menpora busu Imam Nahrawi pas mlepas sida peserta Gowes Pesona Nusantara 2017.

TENGGARONG - Ada 1355 goweser nya ngumpati Gowes Pesona Nusantara (GPN) 2017 nya di adalakan leh Kementrian Pemuda ngan Olah Raga (Kemenpora) RI nya bekerjasama ngan Dinas Pemuda Ngan Olah Raga (Dispora) Kutai Kartanegara (Kukar), Minggu kemai di area Car Free Day Creatif Park Tenggarong (11/06). Kegiatan nya betemakan Senja di Kota Raja tu didatangi leh sida busu  Menteri Pemuda ngan Olah Raga (Menpora) H Imam Nahrawi ngan Bupati Kukar embok Rita Widyasari. 

Dimulai ngan senam masal leh kanak siswa Sekolah Menengah Pertama (SMP) Negeri 04 Loa Janan ngan mlepasikan balon leh Menpora RI busu H Imam Nahrawi didengani Bupati Kukar embok Rita Widyasari sebagai tanda dimulainya GPN 2017 di Kukar. Kegiatan tu jua dirangkai ngan mberikan bendera pataka Gala Desa 2017 nya habistu di teruskan ngan pertandingan eksibisi tenis meja antara busu Menpora H Imam Nahrawi ngan Bupati Kukar embok Rita Widyasari.   

Busu H Imam Nahrawi nyebut amun kegiatan ne yahak program unggulan dari Kemenpora,  sesuai ngan intruksi presiden supaya sida masyarakat Indonesia terus menggelorakan semangat beolah raga, semangat gerakan masyarakat sehat ngan semangat numbuh kembangkan kebersamaan mlalui momentum berolah raga. "Luar biasa, biarnya ada di bulan puasa/Ramadan, peserta bujur-bujur besemangat ngumpati GPN, “uje leh busu Imam Nahrawi. 

Nya jua beharap mlalui program GPN 2017 nya diadakan di 90 kabupaten/kota se Indonesia, ne bisa  diimplementasikan jadi program unggulan di Pemkab Kukar. "Saya beharap selain Car free Day, ada hari khusus besepeda di Kukar," bunyi busu Imam Nahrawi. Bupati Kukar embok Rita Widyasari bujur ndukung ngkan kegiatan GPN,  karna bisa mulai nciptakan masyarakat nya gawal ngkan beolah raga supaya tecipta masyarakat nya sehat. 

"Saya bujuran ngapresiasi ngkan ditunjuknya Kukar ngerjaikan kegiatan ne, soga ja kegiatan ne jadi rintisan ntuk sida masyarakat nya ada di desa sampai ke kota supaya gawal beolah raga," bunyi mbok Rita jua. Di kesempatan tu jua embok Rita jua ngundang busu Menpora H Imam Nahrawi supaya datang di acara Erau nya endak diadakan di bulan Juni 2017. " di kegiatan Erau kendia endak diadakan Lomba Dragon Boat skala Internasional, kami beharap Bapak Menpora bisa datang," bunyinya. Acara tu jua di akhiri ngan diadakannya pengundian dorprize ngan buka besama 1300 anak - anak panti asuhan ngan yatim piatu.(KP.04-Medsi08).