img
img

Bagian Protokol & Komunikasi Publik

Pemerintah Kabupaten Kutai Kartanegara

Berita

Busu Edi Mlepas Sida Peserta One Day Trail Adventure Blukar

date_range 30 Maret 2017 | Oleh : KP.04-Medsi06
Busu Edi Mlepas Sida Peserta One Day Trail Adventure Blukar

FOTO Wabup Kukar busu Edi Damansyah mlepas sida Peserta One Day Trail Adventure Blukar

TENGGARONG – Wakil Bupati Kutai Kartanegara (Kukar) busu Edi Damansyah melepas sida peserta One Day Trail Adventure Blukar (Blusukan Alam Kukar) ke 2 tahun 2017 di Stadion Aji Imbut Tenggarong Seberang, Sabtu (25/3), kemai. Kegiatan nya diadakan leh  Komunitas trail Ready Trail Refreshing (RTR) nya diumpati 700an rider dari 10 kabupaten/kota se Kaltim ngan 63 komunitas trail, yahak kota Samarinda 7 klub, Balikpapan 3 klub, Bontang 3 klub, Kutim 5 klub, Kubar 4 klub, Berau 1 klub, Paser 1 klub, Penajam Paser Utara 2 klub, Mahakam Ulu 1 klub ngan Kukar diumpati 11 Kecamatan 36 klub. 

Selain diumpati leh bubuhan rider Kaltim, One Day Trail Adventure Blukar ne jua diumpati raider luar Kaltim tegak dari DKI Jakarta, Kalimantan Utara, Kalimantan Selatan (Batu Licin), ngan Madiun Jawa Timur. Ngan nempoh jarak sepanjang 45 km nya tebagi dalam 8  zona. Ketua panitia busu HM Sukrawardy nyebut mun RTR Green Kukar ne yahak komunitas nya dipolah di tahun 2015 nya kesahnya tulak di hobby ngan rasa semangat kebersamaan nya bujur-bujur nyaman,supaya ningkatikan rasa bediengsanak sesama trail. 

Diacara tu busu Sukrawardy nyebut amun kegiatan tu ntuk melestarikan ngan mpromosikan kekayaan alam Kukar, sebagai salah satu destinasi wisata di rangka ndukung visi ngan misi Pemerintah Kukar mlalui Gerakan Pembangunan Rakyat Sejahtera tahap II. Selain ntuk ngenalkan ngkan greceknya alam Kukar ke sida pecinta motor trail. “Kami beharap kegiatan ne jadi sarana penyaluran hobby ke sida bubuhan pencinta motor  trail, ngan endak kami berikan pesona tu ke bubuhan sida rider, “ ujenya busu  Sukrawardy. 

Sementara tu, busu Edi Damansyah nyebut amun   RTR ne tebentuk ngkan kepedulian Bupati kukar embok Rita Widyasari  ke sida komunitas nya ada di Kukar ntuk nyalurkan hobby sida ke dunia automotif di hal positif. “Moga ja kepedulian sida bupati etam ne ke bubuhan komunitas–komunitas nya ada bisa lebeh luas lagi,”bunyinya. 

Nya sorang bujur-bujur salut beneh ngan adanya One Day Trail Adventure Blukar kali ne, masalahnya di penyelenggaraannya komunitas trail ne berempu kepedulian ke sida kanak-kanak yatim ngan mberikan paket pendidikan anak miskin dhuafa mlewati LAZ DPU Kaltim cabang Kukar, selain molahkana WC ngan kamar mendi ke ponpes busu Ibnu Karim Desa Perjiwa Tenggarong Seberang,  ngan biaya pendidikan kanak yatim piatu ke panti asuhan Misbahun Munir Tenggarong. “Saya ucapkan terima kaseh ke segala pihak nya dah bepartisipasi supaya kegiatan ne bejalan ngan baik. Moga ja kegiatan ne mberikan manfaat ntuk sida masyarakat, terutama  sida pedagang kaki lima, ”ujenya.(KP.04-Medsi06)

 

BERITA Lainnya